出走台灣 2019 Day 1

喺 2019 年尾木子家去咗五日台灣，計上一次木子家一齊去旅行，應該係喺 2016 年嘅時侯，相隔三年又可以齊人出發，今次我哋係跟永安旅遊，既有交通住宿安排，又可以有部份時間自由活動，咁慢慢講吓我哋今次嘅旅程啦！

由於我哋係搭早機 08:50，集合時間係 05:50，所以要搭零晨 04:00 嘅通宵巴，因為下一班車要到 04:45 先有，令願早到好過趕餐死。

Day 1 行程：

香港 ✈ 高雄、駁二藝術特區、彩虹教堂、旗津海岸公園、高雄大魯閣草衙道、瑞豐夜市、返酒店、六合夜市

住宿：

富驛商旅高雄中華路館

地址： 801台灣高雄市前金區中華三路81號
電話： +886 7 970 8777

Day 1 影片：https://bit.ly/2SQoqiF

出發喇！

香港 ✈ 高雄

香港飛高雄需時一個鐘，估唔到都有一餐食喎！

到步後先去食午飯，第一餐係食中式料理，哩餐係台灣嘅第一餐，味道真係認真麻麻，又啖口又冇口感，因為冇影到相，點嘅款可以去睇片就知。

食完飯後就係過去對面馬路嘅駁二藝術特區，駁二藝術特區都係高雄人唔可以缺少嘅倉庫群，被歷史塵封嘅陳舊倉庫，時光凝結咗種種發展跡象，因為藝術文化嘅呼聲而被解放，不斷注入創意靈感而重獲新生，依家已變成藝術品展示嘅場所，同埋主題展覽廣場。

第二、三個景點就係彩虹教堂同埋旗津海岸公園，因為兩個景點係黐埋嘅！

彩虹教堂係年青人最愛嘅打卡熱點，但想打個靚卡真係唔係咁易，原因係多人到嚇死你。

而旗津海岸公園係高雄市政府特意因應旗津海岸線規劃開發嘅海岸公園，設計以步道貫穿整個公園，包括海水浴場、觀海景觀步道、越野區、自然生態區。

第四個景點係高雄大魯閣草衙道，耗資 50 億打造嘅高雄草衙道，係全台灣首創可預辦登機服務嘅大型遊樂購物中心，位於高雄小港機場旁邊，佔地 2.6 萬坪，有超過 220 間品牌進駐，包括全台灣最大 Apple Store，另有保齡球場、籃球場等，仲有引進日本鈴鹿賽道樂園的國際級高卡車賽道。

去到第五個景點係瑞豐夜市，瑞豐夜市真係好多嘢食，好多條橫行同直行，密密麻麻咁！雖然係好多嘢食，但真係唔知食啲乜好，我哋都只係食咗幾樣嘢！感覺上台灣口味偏向啖口，所以大家都有啲失望。

跟團嘅第一日行程已經完結，之後就安排返酒店，返到酒店休息咗一陣，我哋再出去另一個夜市，路程只需步行約十分鐘，哩個夜市叫六合夜市，六合夜市比較寬敞，又冇咁多人，當然就冇瑞豐夜市咁熱鬧又咁多嘢食啦！

好喇！第一日又早起身，大家都辛苦喇！返酒店好好休息迎接第二日行程。